Свята першай разоры у СВК “Свіслач”

Главная / Новости

24.03.22

Нашы продкі гаварылі: «Калі з любоўю пакласці зерне ў раллю, то і колас вырасце з любоўю да цябе, вялікі і наліўны». І хаця сёння праца сельгасработнікаў механізавана, прыгожы старадаўні абрад захаваўся ў сельскагаспадарчым кааператыве “Свіслач” Гродзенскага раёна і сёння. Яго там праводзяць штогод. І год бягучы не стаў выключэннем.

Адкрыў урачыстую частку старшыня СВК “Свіслач” Васіль Мікалаевіч Густыр, які адзначыў, што спрадвеку ў сялян былі асаблівыя адносіны да пачатку палявых работ. Благаславенне на добрыя справы і ўраджай прагучала з вуснаў настаяцеля Крыжаўздзвіжанскага храма вёскі Свіслач іерэя Андрея Русака. Пасля малебна свяшчэннаслужыцель акрапіў святой вадой збожжа, поле, тэхніку і механізатараў... Шырока крочачы з сявенькамі-лубамі ў руках ішлі Васіль Мікалаевіч Густыр і галоўны аграном Сяргей Саўчык, кідаючы у зямлю адборнае зерне, што, без сумнення, прарасце добрым ураджаем. А затым эстафету пераняла моладзь і адзін з лепшых механізатараў гаспадаркі, Юрый Шашура. Абрадавыя дзеянні праведзены, тэхніка пайшла працаваць на палеткі, адлічваючы першыя гектары, засеяныя яравым клінам. Што ж, Бог у дапамогу табе, чалавек-хлебароб. Бо нездарма кажуць у народзе, веснавы дзень год корміць.